Мавыктыргыч шөгыль тапкан

Илеш районының Иске Кыргыз авылы балалар бакчасында эшләүче Айгөл Фәһим кызы Гәрәева фоамиран, джут җебеннән  күз явын алырлык әйберләр эшли.

- Фоамиран - заманча материал, аның белән эшләве җайлы һәм бик мавыктыргыч. Джут җебеннән эшләнгән әйберләр дә игъибарны җәлеп итә, – ди Айгөл ханым. - Мин балалар бакчасында  пешекче булып эшлим. Буш вакытларымда  анда да яраткан шөгылемнән аерылмыйм.

    Айгөл ханым район конкурсларында ел саен катнашып, урыннар алып тора. Кул эшләре буенча тирә-якта бу бакчаның даны таралган.Районга килгән кунакларны да битараф калдырмый  мондагы матурлык.

 - Карарга килүчеләргә, мастер класслар күрсәтеп, эшләгән әйберне бүләккә дә биреп җибәрәбез. Балаларны кече яшьтән кул эшенә өйрәтү мөһим, дип саныйм. Кызым Эльза да  бу хезмәткә кечкенәдән өйрәнеп үсте. Әле  ул 4 сыйныфта укый, - ди ул.