“Сездә кешеләр җитди”

30 яшьлек Олалекан Самуэль Акинйеми Башкорт дәүләт медицина университетының Уфа клиникасында онколог булып эшли.

Яшь егет табиб һөнәрен үзләштерү максаты белән сигез ел элек Нигериядән Башкортстанга килә. Аңа Уфа һәм, гомумән, Русия бик ошый һәм ул монда калырга була. Бүген Самуэль сайлаган һөнәре буенча эшли.

“Без һәрвакыт сезнең илгә соклана идек. Ләкин миңа һаман да бер нәрсә генә аңлашылмый – ничек яшисез сез бу суыткычта? Әле булса да күнегә алмыйм”, – дип көлә ул.

Ә Уфага Самуэль бик тиз өйрәнгән. “Шәһәрдә иң яраткан урыным – телеүзәк яны, ул тирәдә еш кына йөгерү белән шөгыльләнәм. Башкортстанның аш-суы да бик ошый. Аеруча токмач һәм пилмәнне яратам. Ә кешеләр сездә җитди. Бездә, мәсәлән, колакчыннар киеп, музыкага бию – гадәти күренеш. Ә монда шунда ук читенсенеп карыйлар”, – ди табиб.

Ул 2021 елда Русия гражданлыгын алган һәм быел беренче тапкыр Русия президенты сайлауларында тавыш бирергә барачак.

“Бездә Нигериядә сайлауларга бер ел кала махсус карта алабыз һәм участокка шуның белән барабыз. Карта ярдәмендә теркәләбез, бланк алабыз һәм тавыш бирү кабинасына керәбез. Анда сайлаган кандидатыбызның исем-фамилиясе каршына бармак эзен куябыз. Нигериядә президент сайлаулары эш көннәрендә уза. Ә Русиядә, күзәтүемчә, сайлау көннәрендә ниндидер мәдәни чаралар була. Быел шул мохитне тоярга телим”, – дип сөйләгән ул “RT” мәгълүмат чарасына.