Геройлар онытылмасын!

2020 елның 24 апрелендә, Бөек Ватан сугышында катнашучылар истәлеген мәңгеләштерү максатыннан, Дүртөйле районара прокуратурасы бинасында элеккеге прокуратура хезмәткәре - Даян Баян улы Мурзин хөрмәтенә мемориаль такта куелды.

Даян Мурзин 1921 елның 20 гыйнварында Башкортстанның Бакалы районында туган. 1941 елның маенда ул Рига хәрби училищесын тәмамлый. Бөек Ватан сугышын 10-нчы пехота дивизиясендә взвод командиры дәрәҗәсендә каршы ала.1941 елның октябрендә ул партизаннар отрядына кушыла һәм разведка эшен җитәкли. Ул Украина, Молдова, Словакия, Моравия һәм Чехия территориясендә 1945 елның 9 маена кадәр сугышларда катнаша. Ул партизан отряды штаб начальнигы, Ян Жижка исемендәге халыкара партизан отряды командиры дәрәҗәсенә күтәрелә. Ул "Кара генерал" кушаматы белән таныла.

Советлар Союзын һәм Көнчыгыш Европаны фашизмнан азат итүдә тугры хезмәт иткән өчен 86 орден һәм медаль белән бүләкләнә. Ул Уфаның һәм Чехословакиянең 16 шәһәренең мактаулы гражданины исеменә лаек була.

Сугыштан соң, Даян Мурзин 20 елдан артык БАССР прокуратурасы органнарында, шул исәптән Дүртөйле районы прокуроры ярдәмчесе булып эшли. Соңрак республиканың Эчке эшләр министры урынбасары булып эшләде һәм Башкортстан адвокатлар берләшмәсен җитәкләде.

Ветеран 2012 елның 10 февралендә вафат булды.