"Сөт кухнялары" – сәламәтлек чыганагы

Шәһәрләрдә яшәүче гаиләләр өчен "Сөт кухнялары" булдыру аеруча кирәкле гамәл, чөнки алар төрле яшьтәге балалар өчен файдалы ризык тәкъдим итәләр.

    Башкортстанда балалар тәрбияләгән гаиләләргә ярдәм итүгә юнәлдерелгән «Сөт кухнялары» системасы эше уңышлы оештырылган. 2019 елдан алып эшләп килгән әлеге программага ярашлы, 100 меңнән артык йөкле хатын-кыз һәм ярдәмгә мохтаҗ гаиләләрдән булган бала имезүче аналар махсуслаштырылган туклану продуктларын бушлай алган. 2024 елда әлеге ризыкларны алучылар саны 27 904 кеше тәшкил итте. Бу күрсәткеч әлеге инициативаның төбәк халкы өчен зур әһәмияткә ия булуын ассызыклый.  

   Башкортстан Башлыгы Радий Хәбиров: " Берничә ел элек без җирле чималдан файдалы һәм тәмле продуктлар җитештерүче „Сөт кухнялары“ балалар һәм өлкәннәр өчен дә бик кирәк дигән нәтиҗәгә килдек. “Сөт кухня”сы кулланучылары арасында йөкле хатын-кызлар һәм имезүче аналар да, аз керемле гаиләләрдә тәрбияләнүче өч яшькә кадәрге балалар һәм опекада булган балалар да бар. 2023 елдан без бу исемлеккә махсус операциядә катнашучыларның гаиләләрен дә өстәдек.»

                      МХОда катнашучыларның гаиләләренә ярдәм

    2025 ел Башкортстанда МХО катнашучыларына һәм аларның гаиләләренә ярдәм елы дип игълан ителгән иде. Шуның кысаларында МХО ветераннары гаиләләре «Сөт кухнясы» продукциясен бушлай ала һәм бу кулланучылар санын 1,5 мең кешегә арттырды. Төбәктә 7 сөт ризыкларын җитештерү һәм 132 бирү пункты, шул исәптән мобиль тарату пунктлары эшли, бу 61 торак пунктта яшәүчеләрне азык-төлек белән тәэмин итә килә.

                          Продукция бирү пунктлары кайларда оештырылган?

   Халыккауңайлыбулсынөчен республика шәһәрләрендә продукция бирүне оештыру өчен сигез эре сәүдә үзәге сайланган, параллель рәвештә тагын да дүрт ноктаны эшләтеп җибәрү турында сөйләшүләр алып барыла.

   Халыкның күпсанлы үтенечләре буенча Уфа районының Красный Яр, «Цветы Башкирии», «Молодежный» һәм «Миловский парк» торак пунктларында күчмә акцияләр оештырыла, чөнки әлегә анда даими пунктлар булдыру мөмкинлеге юк. Әлеге исемлеккә Яңа Булгаково микрорайонын өстәү мөмкинлеге карала.

                             Сөт эшкәртү күләменең югары күрсәткечләре

   Дәүләт йөкләмәсен үтәүдән тыш, учреждениенең бюджеттан тыш эшчәнлеген үстерүгә дә зур игътибар бирелә. Узган елның июненнән «Сөт кухнясы " өлкәннәр өчен продуктлар җитештерүне дә башлап җибәрде. Яңа юнәлешне гамәлгә ашыру өчен Октябрьский шәһәре филиалында зур модернизация үткәрелде: гамәлдәге җитештерү бинасына капиталь ремонт ясалды, заманча технологик һәм төрү җайланмалары сатып алынды һәм монтажланды, махсуслаштырылган сөт ташу заводы сатып алынды. Цехның җитештерү куәте өч тапкырга артты.

                         Өлкәннәр өчен ризыклар. Ул нәрсәсе белән аерыла?

    Өлкәннәр өчен тәгаенләнгән ризыклар, балалар продукциясе кебек үк, тулысынча табигый составы белән аерылып тора. Ул җирле фермер хуҗалыклары тарафыннан китерелә торган сөттән, нинди дә булса ясалма ингредиентлар кушмыйча, җитештерелә һәм майның масса өлеше буенча билгеләнгән таләпләргә туры килә. Продукт шулай ук яңартылган «Хәләл»сертификатына ия.

    2024 елда «Сөт кухнясы»ннан балалар эремчеге абруйлы «Русиянең иң яхшы 100 товары -2024» конкурсы лауреаты исеменә лаек булды, ә 3,2% литрлы ПЭТ-шешәгә салынган пастеризацияләнгән эчә торган сөт «Безнең бренд»конкурсында Гран-при яулады.Моннан тыш, “Сөт кухнясы " 2023 елда Башкортстан Хөкүмәтенең сыйфат өлкәсендәге республика конкурсы йомгаклары буенча икенче дәрәҗә дипломга лаек булды.

   “Сөт кухнясы” учреждениесе үз үсешенең барлык аспектлары өстендә кулланучыларының ихтыяҗларына җавап бирүне максат итеп эшли.

   Саннар: «Сөт кухнясы»дәүләт автоном учреждениесе сөт ризыкларын кулланучылар саны 2024 елда 27 904 кешегә җиткән.

   Шуларның 486сы – йөкле хатын-кызлар; 621е – бәби имезүче әниләр; 25616сы – өч яшькә кадәрге балалар; 1181е – МХОда катнашучы гражданнарның  гаилә әгъзалары.

   План буенча, дәүләт бурычы буларак, 2024 елда җитештерү күләме 10399563 сөт продукциясе порцияләре күләмендә билгеләнгән булган. Шул исәптән, 4930531 порция сөт; 4014481 йогурт порциясе, 1454 551 порция эремчек.  Бүгенге көндә “Сөт кухнясы” җәмгыяте тарафыннан җитештерелә торган ризык ассортименты – 32 дәнага барып баса (мәсәлән, сөт, эремчек, йогурт, балалар печеньесы һ.б.).

   "Сөт кухнялары"ның балалар сәламәтлеген саклауда зур роль уйнавы бәхәссез.  Ә илебез, республикабыз балаларының сәламәтлеге – ул безнең киләчәгебез.

  РАМКАГА!

                         "Сөт кухнялары" ни өчен кирәк?

1. Кальций чыганагы: сөт һәм аның ризыклары балаларның сөяк һәм тешләрен ныгытучы кальцийның төп чыганагы.
2. Витаминнар байлыгы: сөт ризыклары A, D, B12 витаминнарына бай, алар балаларның иммунитет системасын көчәйтә.
3. Үсеш өчен кирәкле матдәләр: сөт ризыкларында балаларның үсеше өчен кирәкле азык матдәләре, протеиннар бар.
4. Дөрес тукланырга өйрәтү: "Сөт кухнялары" балаларга иртә яшьтән үк сәламәт ашау гадәтләрен формалаштырырга ярдәм итә.

Фото: bashinform.ru                                         

                                               Гөлара Арсланова.