“ТоНКО”: Коммерцияле булмаган оешмаларның асылы нәрсәдә?

Башкортстанда җәмәгать активистларының һәм коммерцияле булмаган оешмаларның “ТоНКО” исемле беренче төбәкара слеты 16 сентябрьдә Уфада Евразия фәнни-мәгариф үзәге мәйданчыгында узды.

Чарага Башкортстан, Ырынбур һәм Свердловск өлкәләреннән 300гә якын катнашучы җыелды. Программада социаль проектлау, краудфандинг һәм коммерцияле булмаган оешмаларның үсеше буенча өйрәтү семинарлары, дискуссияләр, мастер-класслар, күргәзмәләр каралган иде.

 Чара фикер алышу һәм иң яхшы тәҗрибәләр белән уртаклашу мәйданчыгына әверелде һәм Башкортстан Республикасы Башлыгы грантлары фонды һәм Иҗтимагый проектларның ресурс үзәге ярдәмендә Башкортстан Республикасы Башлыгы грантына үткәрелде.

Башкортстан Иҗтимагый палатасы Аппараты җитәкчесе Элина Гатауллина слетның хакимият белән коммерцияле булмаган оешмалар арасындагы элемтәләрне ныгытудагы мөһимлеген ассызыклады.

Чараның кунагы – Икътисадның югары мәктәбенең Милли тикшеренү университетының Гражданлык җәмгыятен тикшерү үзәге директоры Ирина Мерсиянова федераль мониторинг мәгълүматларын тәкъдим итте. Аңа ярашлы, русиялеләрнең 76 проценты уртак гамәлләргә әзер, 56 проценты коммерцияле булмаган оешмаларга ышана, ә мондый оешмалар эшчәнлеге турында мәгълүмат 81 процентка җитә. Ул гражданлык җәмгыятен үстерүдә Башкортстанның лидерлыгын һәм бу юнәлештә алга таба стратегик үсешнең мөһимлеген билгеләп үтте.

Программа пленар сессияләр һәм алты тематик мәйданчыктан торды. Аларның берсендә җәмәгатьчелек фикерен формалаштыруда һәм ялган мәгълүмат белән көрәштә сүзнең роле турында фикер алыштылар. Спикерлар арасында Башкортстан башлыгының социаль коммуникацияләр буенча идарәсе җитәкчесе Дмитрий Черенков бар иде, ул фейкларга каршы көрәштә коммерцияле булмаган оешмалар белән хезмәттәшлекнең мөһимлеген ассызыклады.

Шулай ук “Геройлар вакыты” программасында катнашучылар һәм аларның гаиләләре өчен социаль проектлау мәйданчыклары, ясалма интеллектны куллану һәм социаль челтәрләрдә проектларны алга этәрү секциясе узды. Коммерцияле булмаган оешмалар өчен юридик һәм бухгалтерлык мәсьәләләре, шулай ук социаль проектлау, салым салу, Юстиция министрлыгына хисаплар тапшыру буенча консультацияләр эшләде.

Трансляцияләр язмалары Иҗтимагый проектларның ресурс үзәге төркеменең “ВКонтакте”дагы сәхифәләрендә бар: vk.com/nko_rb.