Кәсепле кеше югалмас!

   5 сентябрьдә Сибайда «Урал аръягы» VII Бөтенрусия инвестиция сабантуе кысаларында Башкортстан Башлыгы Радий Хәбиров Бөтендөнья һөнәрчелек советы делегациясе белән очрашты.

   Көн тәртибендә – республиканың халык кәсепләрен үстерү мәсьәләләре каралды. Бөтендөнья һөнәрчелек советы президенты Саад Әл-Каддуми билгеләп үткәнчә, Башкортостан тармак һәм туризмны үстерү юнәлешендә зур потенциалга ия.

   – Сез шулкадәр күпне тәкъдим итә аласыз ки, мәсәлән, традицион һөнәрләр, хәләл ризыклар һәм күп кенә мәдәни аспектлар, – дип ассызыклады Саад Әл-Каддуми. - Сибайда без нәрсә эшләргә мөмкин икәнен күрдек инде. Без берләшергә ярдәм итә торган тәкъдимнәр төзиячәкбез. Без бергәләп маркетинг, брендинг, туризмны үстерү өстендә эшли алабыз. Бөтендөнья һөнәрчелек Советы Башкортстанны үз партнерларының берсе итеп карый. Оешма башкорт осталарын халыкара дәрәҗәдә үстерүгә һәм Иран, Кытай һәм башка илләрнең һөнәрчелек җәмгыятьләре белән элемтәләрен үстерүгә ярдәм итәргә әзер.

   Радий Хәбиров делегациягә визитлары һәм төбәккә кызыксыну күрсәтүләре өчен рәхмәт белдерде.

   – Уфа инде «Һөнәрчеләр шәһәре» статусын алды һәм бу гамәли сәнгатьне үстерүгә зур этәргеч булды, – дип билгеләп үтте республика җитәкчесе.- Хәзер осталар бергәлеге белән без бу тармакны яңа дәрәҗәгә чыгарырга мөмкинлек бирә торган чаралар планын әзерләдек. Ел саен май аенда Уфада Халыкара халык сәнгате һөнәрләре фестивале уздырырга карар кылынды, анда төрле төбәкләрдән һәм илләрдән һөнәрмәннәр үз эшләрен тәкъдим итә алачак. Башкортстан Башлыгы шулай ук Сибайның таш кисү сәнгате өлкәсендә «Дөнья һөнәрчеләре шәһәре» буларак танылу өчен бөтен алшартлары барлыгын ассызыклады.

   - Сибайның үз белгечлеге бар –төрле формада ташлар белән эшләү. Биредә уникаль осталар эшли һәм без аларның инициативаларын хупларга ниятлибез. Уфада масштаблы проект – атаклы Гәрәбә бүлмәсе аналогы «Яшма бүлмәсе» өстендә эшлибез, ә Сибайда аның филиалын булдырырга ниятлибез, – диде Радий Хәбиров.

Фото: bashinform.ru