Балкып торыр әле паркыбыз!

Уфада Ленин исемендәге паркта аны төзекләндерүгә багышланган күчмә брифинг булды, дип хәбәр итә шәһәр хакимияте. Парктагы эшләрнең барышы турында башкала хакимиятенең  коммуналь хуҗалык һәм төзекләндерү идарәсе башлыгы урынбасары Ришат Исмәгыйлев хәбәр итте.

   Хәзерге вакытта 17,5 мең квадрат метр мәйдандагы барлык брусчатка, шулай ук бордюр ташлары, яктырту баганалары, чәчәк бакчаларыннан һәм вазоннардан гранит эшләнмәләр сүтелгән. Гранит баскычларны реставрацияләү эшләре алып барыла, шулай ук парапетларны термик эшкәртү башкарыла.

    «Альбит» подряд оешмасы проекты җитәкчесе Сергей Минеев билгеләп үткәнчә, төзекләндерү ике этапта бара. Беренче әзерлек этабы демонтажлауны, инженерлык челтәрләрен урнаштыруны, яшел үсентеләр белән эшләүне күз уңында тота. Паркта наратлар күп, ләкин алар тәртип белән  утыртылмаган. Проект кысаларында без аларны бер зур төркемгә җыеп, биредә роща булдырырга планлаштырабыз, - дип билгеләде ул. - Икенче этап өслекләрне җәюне, яшелләндерүне һәм декоратив эшләрне күздә тота.

    Подрядчы вәкиле шулай ук парк мәдәни мирас объекты булганлыктан, аның төп элементлары һәм объектлары сакланачак, дип ассызыклады.

   Ленин паркын яңарту өчен уфалылар 2025 елда төзекләндерү өчен объектлар сайлау буенча бөтенрусия онлайн-тавыш бирүдә иң күп тавыш бирде. Барлыгы 44 510 кеше тавыш бирелгән. Ленин паркында куркынычсыз мохит булдыру өчен  видеокүзәтү камералары һәм өстәмә яктырту барлыкка киләчәк.

    Шулай ук биредә кече архитектура формалары урнаштырылачак, тематик һәм балалар мәйданчыклары урнаштырылачак, агачлар утыртылачак.