Уфада "Яз көйләре " фестивале белән фонтаннар сезоны ачылды

Анда "От истоков" программасы кысаларында балалар-яшүсмерләр курайчылар ансамбле чыгыш ясады. Башкорт хәрби рухы символы булган курай авазлары җыелган кешеләрнең йөрәкләрен сискәндереп җибәрде.

Бәйрәм Совет мәйданында дәвам итте. Биредә 112нче Башкорт кавалерия дивизиясенең һәм аның командиры Миңнегали Шәйморатовның батырлыгына багышланган "Геройларга мәңгелек дан" программасы старт алды. Мәйданда башкаланың "Мирас" җыр һәм бию ансамбле, шәһәр мәдәният сараеның "Притяжение" җыр театры солистлары һәм "Моторостроитель" мәдәният учагының иҗат коллективлары чыгыш ясады.

Мәдәни эстафета "Җиде кыз" фонтаны янында дәвам итте. Тамашачылар "Геройларның хатын-кыз йөзе" программасы аша билгеле риваятьнең тылсымлы дөньясына чумды.

"Искра" кинотеатры каршындагы мәйданда «Весенняя песнь»уйный башлады. Кунакларны матур номерлары белән сөендерделәр, хуш исле үлән чәе белән сыйладылар, үзләрен милли уеннарда һәм һөнәрләрдә сынап карарга тәкъдим иттеләр.

Яз көйләре Ленин исемендәге мәйданда да яңгырады. Монда тантаналы рәвештә "Сәгатьләр" фонтаны эшли башлады. Программа скрипкачыларны, цирк студияләрен һәм шәһәр мәдәният учреждениеләренең бию коллективларын берләштерде.

Фестивальнең кульминациясе "Кашкадан" мәдәният һәм ял паркында зур финал бәйрәме булды. Ачык һавада махсус җиһазландырылган сәхнәдә яраткан көйләр яңгырады — рус халык җырларыннан алып джаз композицияләренә һәм эстрада номерларына кадәр.

"Башинформ" буенча Юлай НИЗАЕВ әзерләде.