Генетика үсешенә таба барабыз

Башкортстанда вузара кампусының геном үзәге ачылды.

 4 апрельдә Уфада Башкортстан Башлыгы Радий Хәбиров бөтендөнья дәрәҗәсендәге Евразия фәнни-мәгариф үзәгенең югары уку йортлары арасындагы студентлар кампусының геном үзәге эшенә старт бирде. Яңа объект – «Яшьләр һәм балалар» гомумдәүләт проектының «Заманча кампуслар челтәрен булдыру» Федераль проекты буенча төзелә торган биналар комплексының икенче чиратындагы бер өлеш. Геном үзәген ачу тантанасындагы чыгышында Радий Хәбиров ассызыклаганча, республикада фәнни инфраструктураны модернизацияләү тиз темплар белән бара. Бу тикшеренүләр һәм белгечләр әзерләү өчен яңа мөмкинлекләр тудыра.

– Без Башкортстанда фән һәм югары мәктәпнең ничек тиз үсүен күрәбез. Бу горурлык өчен сәбәп, ләкин туктарга ярамый – алда зур бурычлар тора. Безгә кампусның икенче чиратын билгеләнгән вакытта сафка кертергә кирәк булачак. Республика фәнни җәмәгатьчелеккә ярдәм итүен дәвам итә, бу инде яхшы нәтиҗәләр бирә. Барыгызны да истәлекле вакыйга – геном үзәге ачылу белән котлыйм!–- диде төбәк җитәкчесе.

Русия Фән һәм югары белем министры урынбасары Андрей Омельчук видеоэлемтә режимында проектның әһәмиятен һәм аны гамәлгә ашыруның катлаулылыгын билгеләп үтте.

 – Кампус төзү-гади бурыч түгел, ул төбәк җитәкчелеге, федераль хакимият органнары һәм бу объектларны тутыручы һәркемнең игътибарын һәм җаваплылыгын таләп итә. Барыгызны да яңа үзәк ачылу белән котлыйм. Мин IQ-паркның ничек актив эшләвен күрдем. Ышанам ки, монда да тормыш кайнап торачак, ә тикшеренү коллективлары, студентлар һәм укытучылар үзәкне тиз арада яңа мәгънәләр белән тутырачак, – дип белдерде Андрей Омельчук.

Үзәкне ачу тантанасы азагында Русия Фәннәр академиясенең Уфа федераль тикшеренү үзәге һәм «Таврос» ДК дивизионы арасында хезмәттәшлек турында килешү имзаланды. Геном үзәге мәйданчыгында республика башлыгы шулай ук балалар инновацияләр лабораториясендә булды. Журналистлар белән әңгәмәдә Радий Хәбиров Яңа геном үзәген караудан алган тәэссоратлары белән уртаклашты.

– Бу искиткеч объект һәм фән һәм югары мәктәп инфраструктурасын ныгытуга яхшы өлеш кертү. Биредә без генетика һәм санлы технологияләрне берләштердек, чөнки мәгълүматларны эшкәртмичә генетик тикшеренүләрне үстерү мөмкин түгел. Шуңа күрә яңа бинада «Мәктәп -21» ачылачак, анда яшьләрне заманча санлы технологияләргә өйрәтәчәкләр. Әлеге проектның операторы булып Саклык банкы тора. Тиздән без яңа белем бирү программаларын үзләштерү өчен балалар җыюны игълан итәчәкбез, – диде Радий Хәбиров. – Ә без, шул рәвешле, генетика үсешенә чираттагы тапкыр этәргеч бирәбез.

Фото: sterlibashevskierodniki.ru, ufa.rbc.ru