Колледж танымаслык булып үзгәргән

Сибайда шәһәрнең иң борынгы урта махсус уку йорты –  Сибай күп профильле һөнәри көллияте бинасы капиталь ремонттан соң танымаслык булып үзгәргән: биредә җылы, якты һәм уңайлы.

Сибай күп профильле һөнәри көллият директоры Лундеж Байморатов сөйләвенчә, 2023 елда беренче тапкыр Башкортстан бюджетыннан көллиятнең уку корпусын капиталь ремонтлауга акча бүлеп бирелгән.

- Уку корпусында бу акчаларга фасадка, беренче каттагы электр белән тәэмин итү системасына, түбәгә, актлар залына капиталь ремонт ясалды, бинаның агач тәрәзәләре алмаштырылды, -- дип сөйләде Лундеж Халит улы. – Форсаттан файдаланып, Башкортстан Республикасы җитәкчелегенә көллиятнең матди-техник базасын модернизацияләүдә күрсәткән ярдәмнәре өчен зур рәхмәтебезне белдерәбез.

Безнең уку йорты элеккечә абруйлы булып кала һәм абитуриентларның игътибарын җәлеп итә. 2024 елда кабул итү кампаниясе йомгаклары буенча техник белгечлекләргә конкурс бер урынга дүрт кеше тәшкил итте. 2024 елда “Маркшейдер эше”, “Геологик съемка, файдалы казылмалар ятмаларын эзләү һәм разведкалау”, “Мәгълүмати системалар һәм программалаштыру”, “Файдалы казылмалар ятмаларын җир астында эшкәртү”, “Автомобиль двигательләренә, системаларына һәм агрегатларына техник хезмәт күрсәтү һәм ремонтлау”, “Техник эксплуатация һәм хезмәт күрсәтү электр һәм электромеханик җиһазлар” белгечлекләре иң кирәклеләрдән булды.  Күрше өлкәләрдән килүчеләр саны артты.

Шәһәрнең 57 предприятиесе белән безнең көллият студентларының практик әзерлек узуы турында килешүләр имзаланды. Шунысы куанычлы, Урал тау-металлургия компаниясе  предприятиеләрендә нигездә хезмәт килешүләре төзү белән практикага алалар. 

Чыганак: sib-worker.ru