Уфада “чыршы" җәнҗалы купкан

   Уфа районнарының берсендә “чыршы” җәнҗалы кабынып киткән.  Кичә кич Дим районы хакимияте  социаль челтәрләрдә “Орион” иҗат сарае янындагы скверда яңа ел чыршысы пәйда булуы турында хәбәр иткән иде...

    "Участок  хуҗасы белән килешү буенча, Дим районында үскән бу агач Яңа елның төп символы сыйфатында яңа сулыш алды – “Орион” алдына куелды”,  -  дип хәбәр итәләр муниципалитетта шәһәр халкына.

    Бүген исә ачыклануынча, янәсе,  йорты янындагы  бу чыршыны аны  карап үстергән  хатын-кызның килешүеннән башка  гына кискәннәр. Хакимият посты астында ханым  "чыршыны милекчеләр эштә булганда урлап кискәннәр һәм  “Орионе” паркына куйганнар”, - дип яза.

    "Менә шулай,  20 елдан артык чыршыны үстерәсең, үстерәсең дә,  аннары аны шым гына кисәләр һәм аны үстергән кешеләр исәбенә Дим районына „бүләк“ итеп бирәләр. Балага  ел саен бизәгән чыршының кайда булуын хәзер ничек аңлатырга? Нәрсә әйтергә?"- дип язган ачулы  ханым.

     Бу хәбәргә җавап итеп район хакимияте вәкиле дә аңлатма бирде.

    "Чыршы Локомотив урамы, 24 йорт янында җир өсте газүткәргеченең сакланыла торган зонасында үскән. Быел 14 ноябрьдә  “Газпром” белгечләре территорияне агачлардан һәм куаклардан чистарту турында күрсәтмә чыгарды. Коммуналь хезмәтләргә күрсәтмәне 15 декабрьгә кадәр үтәргә кирәк иде. Чыршыны,  гадәттән тыш хәлләр килеп чыкмасын  өчен, мәҗбүри киселергә  тиешлеген исәпкә алып,  утильләштермәскә, ә “Орион”  скверында Яңа ел шәһәрчегенең төп бизәге буларак кулланырга карар кылынды. Бу тәкъдим белән Локомотив урамы, 24 йортта яшәүчеләрнең күбесе ризалашты. 4 декабрьдә чыршыны скверда урнаштырдылар һәм ул халыкка шатлык китереп тора",-дип аңлатты Дим районы хакимиятенең мәгълүмат-аналитика бүлеге башлыгы Айгөл Каменец.