Бөрҗәнлеләр дәваханәдә кара тәнле табибны күреп гаҗәпләнгәннәр

Бу атнада Бөрҗән районы үзәк хастаханәсендә пациентларны яңа хирург кабул итә башлаган. Ул Нигерия гражданины Әхмәт Овал - Башкорт дәүләт медицина университетыннан Бөрҗән районына стажировкага килгән. 

Әхмәт Овал сөйләвенчә, хастаханәдә пациентларның күпчелеге аны күргәч, гаҗәпләнгән. Африка кешесенең авылга эшкә кайтуы күпләр өчен көтелмәгән хәл булган.

- Ни өчен монда эшләргә килүем белән кызыксыналар. Гомум алганда, монда бөтен шартлар да бар, миңа ошый. Халык та  әйбәт. Барысы да ярдәм кулын сузарга әзер, киңәш тә бирәләр, - дип тәэссоратлары белән уртаклашкан Әхмәт Овал.

Бөрҗән үзәк район хастаханәсенең медицина бүлеге мөдире вазифаларын башкаручы Илнур Имангулов:

- Егетләр студент чакта Республика клиник психиатрия хастаханәсендә, Зубово ковид-госпиталендә һәм туберкулезга каршы диспансерда эшләделәр. Тәҗрибәләре җитәрлек. Алар бездә стажировка узачак. Әхмәт Овал - хирургия бүлегендә, ә икенчесе - Оеделе Абдулгазиз неврология бүлегендә эшли, – дип хәбәр иткән.