Мәктәпне беткәч тә бәби?

Дәүләт Думасы депутаты Жанна Рябцева кызлар беренче баласын мәктәпне тәмамлагач та яисә уку йортында укыганда алып кайтырга тиеш, дип белдергән.

Депутатлар демография өчен борчыла. Исегездә булса, Русиянең сәламәтлек саклау министры Михаил Мурашко да белем алып, карьера ясаганнан соң гына бәби табарга теләгән хатын-кызларны тәнкыйтьләгән иде. Министр, бала алып кайтуны иртәгәгә калдырган хатын-кызлар сәламәтлеге ягыннан күп кенә проблемаларга юл ача, дигән фикер җиткерде. Дәүләт Думасында комитет җитәкчесе вазыйфасын башкаручы Татьяна Буцкая исә, балалар саны арттыруны эш бирүчеләр дә кайгыртырга тиеш, дигән фикерен әйтте.

 – Хезмәткәрләре арасында туу коэффициенты нинди? Эш бирүчеләр әнә шуны карасын иде. Бәби таба алучылар быел бала алып кайтканмы? – диде ул. – Эш бирүчеләр күпбалалыкны хупларга тиеш. Мәсәлән, андыйларга оешма өстәмә түләүләр һәм корпоратив, дәүләт ярдәме чаралары турында сөйләүче кураторлар билгели ала. Дәүләт Думасының гаиләне яклау комитеты башлыгы Нина Останина исә «махсус демографик операция» үткәрергә тәкъдим итә. Аның фикеренчә, Русиядә яшәүчеләрнең гаиләсендә дүртәр-бишәр бала булырга тиеш.
САН

• Росстатның яңа мәгълүматларына караганда, 2024 елның беренче яртыеллыгында илдә барлыгы 599600 бала дөньяга килгән. Бу узган елның шул ук чоры белән чагыштырганда 16600 кешегә кимрәк (3%).
• Русиядә шундый ук демографик түбән тәгәрәү соңгы тапкыр 1999 елда билгеләп үтелгән иде. * 2024 елның алты аенда үлүчеләр саны 4 процентка – 888700дән 921100 кешегә кадәр арткан. Ягъни Русиядә үлүчеләр саны туучылар саныннан бер ярым тапкырга диярлек югарырак! *
• Ил халкының кимендә 51 проценты күпбалалы булырга тиеш, дип саный демографлар.  
  Чыганак: vatantat.ru