Радий Хәбиров "Башавтотранс"ка 88 автобус кайтарткан

28 августта «Уфа-Арена» спорт комплексы мәйданчыгында Башкортстан башлыгы Радий Хәбиров «Башавтотранс» ның Уфа һәм Нефтекама филиаллары җитәкчеләренә зур сыйдырышлы 88 яңа «НЕФАЗ» автобусы ачкычларын тапшырды.

Төбәк җитәкчесе предприятие коллективын яңа техника алулары белән котлады һәм Башкортстанның дәүләт бүләкләрен тапшырды.

Төбәк башлыгы билгеләп үткәнчә, предприятиенең төп бурычы – аның филиаллары коллективларын Башкортстан районнарында һәм шәһәрләрендә саклап калу. Моның өчен хезмәткәрләргә карата яхшы мөнәсәбәттә булу, алар турында кайгырту, уңайлы хезмәт шартлары тудыру, шулай ук планлы рәвештә хезмәт хакын күтәрү мөһим.