Күмәк кылынган дога 25 тапкыр көчлерәк

Һәр җомга намазыннан соң республика мәчетләрендә махсус хәрби операциядә хезмәттә булган яугирләр һәм һәлак булганнар өчен дога кылыначак. Башкортстан Республикасы Башлыгы Радий Хәбиров аларның туганнарыннан килгән мөрәҗәгатьләргә битараф калмады: Хөкүмәттә үткән оператив киңәшмәдә ул руханиларга шушы тәкъдим белән чыкты.

• Яугирләр өчен болай да бөтен мәчетләрдә дога кылына иде, - диде Башкортстан мөселманнары диния нәзарәте рәисе, мөфти Айнур Биргалин. – Бүгенге көннән ул җомга намазларыннан соң калдырылмый үтәләчәк.

Уфа шәһәренең Дим бистәсендә җомга намазы алдыннан вәгазъ сөйләгәндә “Мәдинә” мәчетенең имам-хатыйбы Замир Хәйруллин СВОга аерым тукталып үтте. “Һәр намаздан соң үзегез өйләрегездә МХОда катнашкан егетләр өчен дә өйләренә исән-сау әйләнеп кайтуларын сорап, һәлак булганнарны да искә алып, аларның рухлары өчен дога кылыгыз “, - диде ул.
Республика мәчетләрендә дә коллектив дога кылынды. Әйтик, Аскын районыннан бүген 300ләп кеше махсус хәрби операциядә катнаша. Аскын үзәк мәчетендә дә аларны искә алып, Аллаһы Тәгаләдән җәмәгать белән исән-сау әйләнеп кайтуларын сорадылар.

• Район мөселманнары республика башлыгының тәкъдимен тулысынча хуплады, - диде үзәк мәчет имам-хатибы урынбасары Мөслим хәзрәт. – Җомга саен махсус хәрби операцә Русиянең җиңүен сорап дога кылабыз. Кызганычка каршы, сугыш корбаннарсыз булмый. Ватаныбызның якты киләчәге хакына гомерләрен биргәннәрнең якты рухына багышлап Коръән Кәримнән аятьләр укыйбыз. Аллаһу Сөбхәнәһү үә Тәгалә кылган догаларыбызны кабул итәр дип ышанабыз. Чөнки җәмәгать белән кылынган дога ялгыз кылынган догадан 25 тапкыр көчлерәк.

Иншәә Аллааһ, махсус хәрби операция Русия мәнфәгатьләрендә тәмамланып, ир-егетләребез тизрәк якыннары янына әйләнеп кайтса иде!