Башкортстанда алты бертуган үзләренә яңа гаилә эзли

Аларның анкетасын республиканың Хезмәт министрлыгы чыгарган.

Иң өлкәне - Айнур, ул 9 нчы сыйныфны тәмамлаган. Укуын көллияттә дәвам итәргә уйлый. Кызларның иң зурысы Айгөл исемле, аңа 14 яшь. Ул бертуганнарының барысы турында да кайгырта, карый. Киләчәктә пешекче-кондитер булырга хыяллана, шигырьләр һәм детективлар укырга ярата.

12 яшьлек Айрат кыюлыгы белән аерылып тора, спорт белән мавыга һәм техника белән кызыксына. 9 яшьлек Азалия тыйнак холыклы кыз - рәсем ясарга сәләте бар. Бик кызыксынучан, уңган - нәрсәгә булса да өйрәнергә тырыша.

Иң кечеләре - игезәкләр Айсылу белән Айдар. Аларга алтышар яшь. Быел мәктәпкә баралар.

Шушы сабыйларның әти-әнисе булырлык мәрхәмәтле кешеләр табылыр микән, кемнәр аларны тәрбиягә алыр? Бәлки безнең укучыларыбыз арасында күп балалы гаилә турында хыялланучылар бардыр?

Балалар турында тулырак мәгълүмат алу өчен

 8 (347) 218–03-62 номерына шалтырата аласыз.