Яшүсмер малайлар бер ирне судан коткарганнар

17 июль көнне Башкортстанның Наратасты авылы янындагы Шаран сусаклагычында яшүсмер малайлар - 17 яшьлек Даниил Тураев, 16 яшьлек Максим Гришуков һәм 16 яшьлек Айдар Хәбиров 49 яшьлек ир-атның гомерен саклап калганнар.

Социаль челтәрләрдә хәбәр ителгәнчә, балалар сусаклагыч ярында ял иткән һәм исерек ир-атның ярамаган урынга су коенырга киткәнен күргәннәр. Суга кергәч, ул кинәт күздән югалган.

Егетләр шундук суга чумганнар, су астында Айдар ир-атны табып, киеменнән эләктереп, өскә сөйрәгән. Аннан дуслары ярдәмгә килгән. Даниил белән Максим аны ярга тартып чыгарганнар, ир-ат аңсыз яткан. Даниил иргә ясалма сулыш ясап, йөрәген эшләтеп җибәргән, ә Максим шул арада 112гә шалтыраткан. Шулай итеп, балалар теге дөньяга китеп барган ирнең гомерен саклап алып калганнар.

Даниил - Туймазы юридик көллиятенең беренче курс студенты, Максим белән Айдар – 9 класс укучылары. Алар барысы да Наратасы урта мәктәбен тәмамлаучылар.

Егетләрнең сүзләренә караганда, ир-атны коткарырга аларга ОБЖ дәресләрендә укытучы Марсель Гыйниатуллиннан алган белемнәре ярдәм иткән.

Ир-атны коткарган өчен балалар Русия Гадәттән тыш хәлләр министрлыгының ведомство бүләкләренә тәкъдим ителгән.

Афәрин, егетләр! 

Чыганак: Башинформ