Мәрхүм әтинең сотовый номерын үземә калдырасым килә...

Әтиебез үлде. Аның кесә телефоны номерын үземә  алырга телим. Моны ничек эшләргә?

                Рита.

   “Мәрхүм булган туганның кесә телефоны номерын мирас итеп алырга ярамый, ә менә телефонның үзен – ярый” , дип аңлата бу җәһәттән адвокат Екатерина Антонова.

   Эксперт сүзләренчә, абонент вафат булгач, элемтә операторлары аңа беркетелгән номерларга хезмәт күрсәтүне туктатырга һәм барлык сим-карталарны блокировкалап куярга тиеш. Бу мошенникларга һәм шәхси мәгълүматның читләргә билгеле булуына каршы тору өчен эшләнә. Әгәр дә блокировкалау автоматик рәвештә булмаса, иң яхшысы – компаниягә  мөрәҗәгать итү, үлем таныклыгын күрсәтү һәм шулай итеп процессны тизләтү.

   "Телефон номеры, сим-карта кебек үк, мирас итеп алынмый, - ди  Екатерина Антонова. - Ләкин мәрхүмнең туганнары шул ук телефон номерына яңа килешү төзү өчен элемтә операторына мөрәҗәгать итә алалар. Моның өчен

• абонентның үлеме турында таныклыкны,
• мираска хокук турындагы таныклыкны (аны нотариус бирә),
• варисның паспортын һәм ике гариза – мәрхүм белән килешүне өзү һәм яңасын төзү турындагы гариза күрсәтергә кирәк.

   Кайбер очракларда нотариустан варислар даирәсе турында белешмә дә кирәк булырга мөмкин.

Фото: yugopolis.ru