Махсус тариф буенча кайларга барып була?

    Быел субсидияләнгән авиаочышлар программасы озайтылдымы ул? Аның буенча кайларга барып була?

                         Р.Хәйдаров. Уфа шәһәре.

    Республиканың Транспорт Министрлыгында аңлатуларынча, субсидияләнгән авиабилетлар ул – махсус түбәнәйтелгән тариф буенча льготалы авиабилетлар. Аларны

• 23 яшькә кадәрге яшьләр;
• пенсионерлар (55 яшьтән өлкәнрәк хатын-кызлар һәм 60 яшьтән өлкәнрәк ир-атлар);
• ничә яшьтә булуына карамастан 1 группа инвалидлары;
• инвалид балалар һәм аларны озата баручы;
• 2 һәм 3 группа балачактан инвалидлар;
• күп балалы гаиләләр (бу статусны раслаучы документларны күрсәтергә кирәк) сатып ала ала.

    Росавиация мәгълүматларына караганда, Уфа аэропортыннан субсидияләнгән авиаэлемтәләр программасы буенча Әстерхан, Волгоград, Грозный, Кемерово, Красноярск, Надым, Нарьян-Мар, Түбән Новгород, Новокузнецк, Норильск, Ноябрьск, Омск, Салехард, Саратов, Тобольск, Ханты-Мансийск, Якутск, Ярославль шәһәрләренә очарга мөмкин.