Марат Сафаров морзалар төяге хакында

Нәфисә Акчурина җитәкләгән Мәрьям Солтанова-Акчурина исемендәге татар зыялылары клубында Мәскәүдән килгән тарихчы, радио журналисты, педагогика фәннәре кандидаты Марат Сафаровның лекциясе булды.

Бер тында тыңланган бу чыгышта ул "Тени Касимовского ханства " һәм "Темников - крепость империй" дип аталган китапларының язылу тарихын сөйләде. Анда Рязань, Түбән Новгород, Мордовиядәге татар морзалары нәселләре хакында сүз барды. Терегуловлар, Бигловлар, Енгалычевлар, Еникеевлар, Мамлеевлар, Диваевлар, Бәхтизиннар чыккан авыллар аталды. Шакуловлар нәселе, Касыйм ханлыгы морзалары хакында мәгьлүматлар китерелде. Залда аталган нәселләрнең вәкилләре булу лекция-очрашуны мавыктыргыч һәм кызыклы итте.