Мунча керүнең дә үз тәртибе бар

Роспотребнадзор кышкы салкыннарда  сауналарга һәм мунчаларга  бару буенча киңәшләр бирде.

    “Салкын көннәр – мунчага  яки саунага бару өчен бик яхшы вакыт, - дип  ассызыкладылар Роспотребнадзорда. - Мондый ял яхшы истәлекләр генә калдырсын өчен кайсыбер киңәшләргә колак сала белергә кирәк.

      Иң беренче чиратта, шуны онытмаска кирәк –  сауна һәм мунчада киенү  бүлмәләрендә һава температурасы нормада каралганча  25-28 градус булырга тиеш. Мунчада кунаклар схема буенча башта гардеробка, аннары чишенү бүлмәсенә, шуннан соң юыну һәм  “парилка” бүлмәләренә керәләр.  Санузеллар киенү бүлмәләрендә урнаштырылырга тиеш.

• Хлор исе сизгән очракта, мунча һәм бассейнга керүдән тыелу яхшырак. Бу – организм өчен куркыныч булган гиперхлоризация турында сөйли.
• Саунага керер алдыннан душка керегез, тастымал белән коп-коры итеп сөртенегез. Башка эссе капмасын өчен чәчләр коры булырга тиеш.
• Беренче тапкыр парилкага 3-4 минутка гына керегез. Һәм җиләс душ (18 градус) астына басыгыз.
• 20-30 минут ял иткәннән соң парилкага 10-15 минутка икенче тапкырга керегез. Парилкага керүләр арасындагы тәнәфестә арыганлык бетәргә һәм пульс нормальләшергә тиеш. Сауна керү вакыты өч сәгатьтән артык дәвам итәргә тиеш түгел.
• Парилкада аяклар гәүдәдән бераз югарырак булырга тиеш – бу  йөрәк эшчәнлеген җиңеләйтә. Һичъюгы  аяклар тән белән бер биеклектә булсын өчен чүгәләргә мөмкин.
• Ачкарынга яки тулган ашказаны белән парилкага керергә ярамый. Саунага кадәр һәм аннан соң авыр ризыклар ашарга, спиртлы эчемлекләр, шул исәптән сыра эчәргә киңәш ителми. Саунадан соң организмдагы су-тоз балансын тулыландыру өчен су яки чәй эчәргә кирәк.
• Салкын тигәндә, хроник авырулар, тромбофлебит, югары кан басымы кискенләшкәндә саунага йөрү киңәш ителми”.