“Төп максат – авылыбызны ямьләү”

Республика районнары “Урындагы башлангычларга ярдәм күрсәтү”(ППМИ) программасында актив катнаша, ел саен аның ярдәмендә авылларда төрле объектлар төзекләндерелә, мәктәп, балалар бакчалары кебек социаль биналар ремонтлана, һәйкәлләр ачыла, чишмәләр төзекләндерелә, юллар яңартыла, янгын сүндерү машиналары алына, зиратлар тәртипкә китерелә. Благовар районының Иске Абзан авылы халкы да шушы изге максатка ирешү өчен республика программасында катнаша.

Күптән түгел Күчәр­бай авыл биләмәсенә караучы Иске Абзан авылында халык җыены үтте. 200­дән артык халкы булган бу авылның соңгы чорда тормыш-көнкү­решендә байтак проблемалар җыелган. Авыл зиратларын төзекләндерү көнүзәк мәсьә­­ләләрнең берсе булып тора. Бу хакта Кү­чәрбай авыл би­ләмәсе башлыгы Радик Фәр­хет­ди­нов та белдерде һәм, программа конкурсында җиңеп чыккан очракта, Иске Абзан авылы халкына ныклы ярдәм күрсәтеләчәген ышандырды.
Җыелышта халык зур активлык күрсәтте. Чыгыш ясаучыларның төрле фи­керләре яңгырады. Әмма күпчелек авыл зиратларын төзекләндерү яклы булып чыкты, шуңа да программада катнашуда өстенлек әлеге максатка бирелде.
Авыл җыены алдыннан ППМИда катнашу өчен ун кешедән торган оештыру төркеме төзелгән. Аның җитәкчесе итеп җәмәгать эшчәнлегендә бай тәҗрибә туплаган Рәви­дә Әх­мәтҗанова сайланган. Ул авылда бик ихтирамлы вә хөрмәтле кеше – өч дистә елга якын укытучы булып эшләгән. Җыелыш­та, моннан тыш, халыктан акча җыюны оештыру, материаллар сатып алу, төзек­ләндерү өмәләре үткәрү мәсьәләләре хәл ителгән.
Оештыручылары актив һәм уңган булгач, Иске Абзан авылы халкы, җыелыш тә­мам­лану белән, “Киндер­күл” һәм “Башкорт очы” зиратларына өмәгә чыкканнар. Хатын-кызлар чүп-чардан арындырса, агач­ларны кисү, техника белән аларны чүплеккә ташу – ир-атлар җилкәсенә төшкән.
— Авыл зиратларында өмә­ләр ике көн барды. Бу бик зур эшне, ниһаять, башкарып чыгуыбызга бик шатбыз! — ди Рәвидә Әхмәтҗанова. – Авылдашларга,  шулай ук өмәгә дип кайткан чит җирләрдә яшәүче якташларга олы рәхмәтләребезне бел­дерәбез. Әле эшләр күп, киләчәктә барысын да эшләп, максатларыбызга ирешербез, - ди ул.

 Теләкләрегез тормышка ашсын, абзанлылар!