"Май гүзәле" ул

“Май гүзәле” исеменә Динара Акмалова лаек булды.

Динара - талантлы, моңлы тавышлы, сылу кызларның берсе. Илеш районы Югары Яркәй авылында туган, арытаба гаиләсе белән Татарстан Республикасының  Актаныш авылына күченгәннәр. Әлеге көндә Әлмәт шәһәрендә яши.

 “Кечкенәдән үк мин музыкага гашыйк идем. Әниемнең сөйләве буенча, мин бишектә җырлый башладым. Минем беренче укытучым-әбием Рәзинә Акмалова . Ул Илеш районы Аккүз авылында яши. Без аның белән татар һәм башкорт халык җырларын өйрәндек һәм башкардык һәм кечкенә авылыбызда концертларда чыгыш ясадык. Актаныш районының  музыка мәктәбендә Лилия Ревал кызы Мостафинада  укыдым. Ул “Тамчы” вокаль ансамбленең сәнгать җитәкчесе булып тора. Без шәһәр, республика һәм Бөтенроссия концертларында һәм конкурсларында чыгыш ясадык һәм катнаштык, призлы урыннар яуладык. Аннары миңа Башкортстанның атказанган мәдәният хезмәткәре Джон Әхмәт улы Мусин белән танышу бәхете тиде. Җиде ел дәвамында ул мине музыка дөньясына алып керде,  җырлау сәнгатенә өйрәтте. Нәкъ менә аның канаты астында мин "Йолдызлык" конкурсының күп тапкыр лауреаты булдым. Музыка мәктәбен тәмамлагач, мин үз юлымны Ф.З. Яруллин исемендәге Әлмәт музыка көллиятендә Әлфия Насыйх кызы Нургалиевада дәвам итәргә булдым. Аның кул астында  "Браво, Әлмәт", "Йолдызлык", "Сандугач сайрар илем" һ.б.  конкурсларда, фестивальләрдә чыгыш ясавымны һәм катнашуымны дәвам итәм. Бер ел инде мин "Әлмәт" милли мәдәни үзәгендә эшлим һәм "Яшьлек"халык ансамблендә катнашучы һәм солист булып торам”,– ди ул үзе турында.

Җырчы кыз агымдагы елның 1 апрелендә "Сандугач сайрар илем" ХХVl  төбәк балалар һәм яшүсмерләр иҗаты фестивале стипендиаты булды.

Уңышлар сиңа, Динара, киләчәктә дә сәхнәдә  моңлы тавышың яңгырап торсын, күркәм чыгыш ясавыңны дәвам ит.