Балык кап, яр өстендә ялтырап ят

Кышкы балык тоту – үзенчәлекле шөгыль. Боз өстендә салкын җилдән курыкмыйча, балык тотып утыручыларны күреп гаҗәпләнә идем. Әмма, борынгылар әйтмешли, кәҗәсендә түгел, мәзәгендә хикмщте, диләрме әле?

Үткән ялларда Кушнаренко районының Иске Гомәр авылына мине дә кышкы балык тоту ярышына чакырдылар. “Балык фестивале үткәрәбез, кызык дип тапсаж, кайт, уха пешерербез”, – дип шалтыраттылар авылдашларым. Ике дә уйлап тормадык, тормыш иптәшем белән машинага утырдык та җилдердек Акбаш күленә.

Кармакларны барладык, туктап кибеттән суалчаннар кереп алдык.

Акбаш күленә барсак... Машина куярга урын юк. Сабантуймени! Авыл халкы гына түгел, район үзәгеннән, Уфа шәһәреннән кайтканнар. Чын кышкы Сабантуйга әйләнгән.

Сеңлемнең улы Финат иртүк барып безгә дә бәке уеп куйган иде. Күптән түгел алар, волонтерлар белән чыгып, Иске Гомәр авылының Сөлекле күлендә балыкларга тын алырга бәкеләр уеп йөргәннәр иде.

Бар җирдә уен-көлке, шаяру, кармакчылар балык тотып утыра. Ришат Гомәровның бәкесе янында инде биш-алты балык ята. Күземә, чын балыкчылар киеме киеп, балык тотып утыручы ирле-хатынлы бер пар чалынды. Аларның чын балыкчылар икәне щллщ каян күренеп тора: үзләре белән әллә күпме әйберләр алып килгәннәр. Бәкеләре янында эре генә балыклар ята. Үзебезнең авыл кызы Гүзәл тормыш иптәше Фидан белән Дим бистәсеннән кайтканнар икән.

• Без балык тотарга яратабыз, балалар белән дә балыкка йөрибез, - диде елмаеп Гүзәл. – Зур балык эләксә – барыбызга да бәйрәм. Җәй көне палаткалар белән чыгып, уха, шашлык пешереп, балаларны уйнатып кайтабыз. Үзебезнең балык ыслау ьайланмасы бар, балыкларны шунда щзерлщп ашыйбыз. Чуртан карп, толстолоб, корбан балыгы, алабуга, табан балыгы, ак амур тотабыз. Толстолоб балыгын тотуы бик авыр.

Сөйләшеп торган арада Гүзәлнең ире Фидан тагын бер балык тартып чыгарды.

Үзебезнең бәке янына китеп барганда, ике апаның мәш килеп балык тотуын күреп, алар янына да тукталдым. Ильвира Биктимерова-Вакилова белән Рузалия апа Камалова да балык тотарга ярата икән.

• Балык тоту – үзе бер кызык бит, - ди Ильвира апа. –

Ике сәгать ярыш бик тиз үтеп китте. Комиссия, һәр балык тотучының балыкларын санап, җиңүчеләрне билгеләде, бүләкләде. Бик матур бүләкләү чарасыннан соң уха пешереп, кайнар чәй эчеп җылынды кунаклар.

Мин исә авыл хакимияте башлыгы Айваз Рәсил улы Сәмигуллиннан авыл тормышы белән кызыксындым.

• Былтыр авыл халкы республикада үткәрелә торган “Аек авыл” конкурсында катнашырга теләк белдерде. Районда үткән муниципаль этапта беренче урынны алып, республика күләменә чыктык, – дип бәян итте ул. – Авылдашлар бик актив, чаралар үткәрик дип кенә торалар. Чараларга хәтта читтә яшәгән авылдашларыбыз да кайта. Үткән атнада “Хәрбиләргә ярдәм ит” акциясе кысаларында мәдәният йортына җыелып мобилизацияләнгән солдатларга оекбашлар бәйләделәр. Бу изге эшкә авылның бөтен хатын-кызлары да кушылды. Һәркем үз өлешен кертергә тырышты. "Безнең күңел җылысы кушып бәйләнгән җылы оекбашлар солдатларга ярдәм итәр дип ышанабыз», - диеп таралыштылар апалар. Шушы изге чарага килгәннәре, күз нурларын, күңел җылысын салып оекбашлар бәйләгәннәре өчен хатын-кызларыбызга рәхмәт сүзләре әйтәсе килэ.

Авылда башка күп кенә файдалы эшләр башкарылып тора. Башкортстан Республикасы Башлыгы Радий Хәбировның 2023 елны “Кече Ватан өчен файдалы эшләр елы” дип игълан итүенә дә актив кушылган авылдашлар. “Сөмбел” фольклор ансамбле кызлары җыелышып авылыбызның йөзек кашы булган чишмәгә барып өмә үткәргәннәр. “Чишмәләрне тәртиптә тоту – иавыл халкының изге бурычы, – ди мәдәният йорты директоры Зилә Сәгыйть кызы Гомәрова. – Язын, җәен, көзен, кышын чишмә буен чистартып торабыз”.

Иске Гомәр авылы  райондагы иң укый торган авыл исеменә дә дәгъва итә. “Цифрлы технологияләр үсеш алса да, без басма матбугатны яратып укыйбыз, - ди Айваз Рәсил улы. – Почта хезмәткәрләре гәзит-журналларга язылу планын үтәп киләләр. “Өмет”, “Авангард”-“Яңа көн”, “Манзара” гәзитләрен, “Башкортстан укытучысы” журналын һәр өйдә диярлек алдыралар. Ямаева Ләйсән белән Хөснириялова Гүзәл ханымнар үз эшләрен җаваплы башкаралар”.

Шулай итеп, авыл халкы “Балык фестивале”ннән бик канәгать таралышты. Җиңүчеләргә бүләкләр әзерләгән иганәчеләр Айрат Локманов, Ландыш Вәлиуллина, Дамир Зәйнуллинга рәхмәтләр әйттеләр.