Мишкәлеләрне чүплек борчый

Башкортстан экологларын Мишкә районындагы  җитди хәл борчый: район үзәге Мишкә авылы туры мәгънәсендә чүп-чарга батып утыра.

     Экологлар фикеренчә, монда проблема – “Стройпроект” компаниясе эшчәнлегендә.

     Күптән түгел Мишкә авылында  “Гомумрусия халык фронты” вәкилләре булып киткән. Максатлары –  кеше  нәҗесләренең каты көнкүреш калдыклары полигонында туфракка агызылуы турындагы  җирле халыкның аһ-зарларын тикшерү иде. Бу факт расланган.    “Стройпроект”  компаниясенең махсус техникасы, чыннан да, сыек калдыкларны полигонда утильләштергән. Ә моны чистартучы корылмаларда башкарырга кирәк.

    Республиканың Экологлар берлеге рәисе Александр Веселов быелның июнь аенда Мишкә районында булуы турында сөйләгән. Ул чакта  табигать саклау һәм санитария-эпидемиология законнарын тупас бозулар теркәлгән.

    Веселов  әйтүенчә, “Стройпроект " район хакимияте  белән 2014 елда төзелгән авылның көньяк-көнбатыш читендә урнашкан һәм елына 5865 тонна калдык  күмүгә  исәпләнгән полигонда каты көнкүреш калдыкларын үтильләштерүне оештыру турындагы  килешү буенча йөкләмәне үтәмәгән.

- Моннан тыш, полигон янындагы урманлы участокта өч гектарга якын  санкцияләнмәгән чүплек барлыкка килгән, - ди Александр Калинович.