Башкалага мәдәни сәфәр

    Иң якын дус – сыналган дус, диләр. Еллар дәвамында сыналган, кирәк вакытта бер-береңә таяныч булуны, хуплауны,  ярдәм кулы сузуны күз уңында тоткан дуслык кешеләр арасында гына түгел, коллективлар арасында да булырга мөмкин. Безнең “Өмет” гәзите дә шундый тугры дуслары булуы белән горурлана. Алар – Борай почтамтының дус-тату коллективы.

     “Өмет” гәзитен күпләп алдырып укучы әбүнәчеләребез  шушы почтампка караган авылларда яши. Без исә ике арада дуслык күпере урнаштыручы, һәр райондашны “Өмет”ле итәргә тырышып эшләүче почтальоннар белән даими очрашулар үткәрүне зур мәртәбәгә саныйбыз.

     Күптән түгел тагын шундый күркәм очрашу оештырдык: гәзитебезне халыкка таратучы дусларыбыз – Яңа Бикмәт почта бүлекчәсе җитәкчесе Ильфира Җәмил кызы Билалова, Кәшкәләү почта бүлекчәсе почтальоны Рида Сабир кызы Фәезова һәм Кушманак почта бүлекчәсе почтальоны Хализә Кәниф кызы Баһаветдинова Борай почтамтына “өмет”челәр белән очрашуга бик теләп килделәр. Максатыбыз – шушы уңган, булдыклы почтальоннарга 2022 елның 2нче ярты еллыгына “Өмет” гәзитенә язылуны уңышлы оештырганнары өчен рәхмәт хатлары һәм редакциянең истәлекле бүләкләрен тапшыру, тырыш хезмәтләре өчен рәхмәт сүзләребезне җиткерү иде.

     Очрашуны гадәттәгечә Бөре почтамты  (Борай почтамты шуңа карый) җитәкчесе Данис Рәшит улы Гыйлфанов бик җылы башлап җибәрде.

• Дусларыбыз, “Өмет”челәр, бүген бездә кунакта. Бу очрашуга бик шатбыз, - дип башлады ул сүзне. – Һәрберебез белеп, аңлап торабыз – почта өлкәсендә эшләүчеләр, аеруча почтальоннар халыкка кирәкле һөнәр. Шушы гади, әмма бик тә файдалы эш башкаручы хезмәттәшләремне хөрмәт итеп килүегезгә, аларның хезмәтен күрә, бәяли белүегезгә сезгә нык рәхмәтлебез. Алдагы көннәрдә дә райондашларыбыз өчен тырышып эшләрбез. “Өмет” гәзитен яхшы беләбез. Басма битләрендә һәрвакыт актуаль, дөреслеккә туры килгән, фәһемле мәгълүматлар дөнья күрә. Районыбыз халкы “Өмет” аша республика тормышы, андагы хәл-вакыйгалар, үткәрелгән һәм планлаштырылган чаралар турында укып белә. Без үрнәк алырлык уңай мисаллар – гаиләләр булсынмы ул, мәктәпләрме, предприятие һәм оешмалардагы уңышлармы – “Өмет” журналистлары барысы турында да бик җылы язалар. Шундый җылы язмалар турында укып, райондашлар тагын да дәртләнебрәк, максатлар куеп, шуларга ирешеп яшәргә омтыла. “Өмет”челәр, хезмәтегез өчен зур рәхмәт! Без дә үз чиратыбызда райондашлар арасында “Өмет”не укучылар санын арттырырга тырышабыз – былтыр, мәсәлән, гәзиткә планнан тыш 100 экземпляр күбрәк яздырып куйганбыз. Бу тагын бер мәртәбә укымлы басманың кирәклеге, файдалы булуы турында сөйли. Үземнең хезмәткәрләремә дә рәхмәтләремне җиткерәсем килә – сау-сәламәт булып, матур итеп эшләргә, башкаларга үрнәк булып яшәргә язсын.  Алдагы көннәрдә дә әлеге кебек матур очрашуларыбыз булып торсын иде.

      Данис Рәшит улының сүзләреннән соң очрашуны “Өмет” гәзитенең баш мөхәррире Рәдис Гыйльван улы Ногманов дәвам итте:

• “Өмет”челәр һәм Борай почтамты почтальоннары арасындагы дуслыгыбыз – элек-электән салынган ныклы күпер ул. Почта өлкәсендә нинди генә үзгәрешләр булмасын, бәйләнешләрне өзмибез. Борай почтамтының подписка бүлеге хезмәткәрләре белән дә даими сөйләшеп торабыз. Искә алгансыздыр, почта хезмәте әйбәт эшләгән районнарда гәзит-журналларга күбрәк язылалар. Борай почтамты – шундыйлардан. Әле менә очрашу алдыннан Данис Рәшит улы районда бер генә почта бүлегенең дә ябылмавы, һәрберсен саклап калулары турында әйтте. Бу бик яхшы күренеш, чөнки әле бер районда, әле икенчесендә почта бүлекчәләренең ябылуы турында редакциябезгә шалтыратып, зарларын җиткерәләр. Тырыш хезмәтегез өчен зур рәхмәтебезне җиткерәбез.  Мин киләчәктә дә шулай аралашып яшәрбез дип уйлыйм: без эчтәлекле, укымлы, файдалы гәзит чыгаруыбызны дәвам итәрбез, ә сез аны райондашларыгызга таратуда безнең тугры ярдәмчеләребез, якын дусларыбыз булып калырсыз. Бүген күпләребез, аеруча яшьләр, интернетка, төрле сайтларга  мөкиббән. Ләкин басма матбугатны – шул исәптән басма “Өмет”не дә –  бергәләшеп саклап калырга тиешбез. Моны ике арада ныклы хезмәттәшлек булганда гына тормышка ашырып була.

     Менә шулай җылы сәламләү, рәхмәт сүзләреннән соң баш мөхәрриребез Рәдис Ногманов Ильфира Билаловага, Рида Фәезовага, Хализә  Баһаветдиновага рәхмәт хатлары һәм редакциябезнең истәлекле бүләкләрен тапшырды. Борайлыларга гына хас булганча, почтальон ханымнар тыйнак кына елмаеп, рәхмәтләрен белдерделәр һәм бертавыштан “Өмет”нең райондашлар арасында чыннан да яратылып укылучы басма булуы турында әйттеләр.

      Әлеге вакытта Борай почтамтына караган авылларда 818 кеше “Өмет” гәзитенә язылган. Алдагы көннәрдә  яраткан басмаларыннан аерылырга теләмәгән райондашларны декадник – гәзитләргә ташламалы хакка язылу көтә. Шушы чорда “Өмет”кә язылучылар саны тагын да артыр дигән өмет бар.

                   “Карашлар сезгә юнәлгән...”

        Әйткәндәй, Борай почтамтында оештырылган бу җылы очрашу дәвамлы булды: сишәмбе көнне  Борай почтамтының 13 хезмәткәре – почтальоннар, почта бүлекчәләре җитәкчеләре – үзләре дә редакциябезгә кунакка килделәр. Аларның күбесе “Өмет” гәзите редакциясе урнашкан бинаны, бүлмәләрне беренчегә күрә – барысы белән дә кызыксыналар.  “Өметчеләр” оештырган җыйнак кына чәй табыны артында сөйләшеп сүзләребез бетмәде – почта өлкәсендәге яңалыклар, райондашларны гәзитләргә яздыру, дөнья хәлләре, тормыш-көнкүреш, яшәеш  һәм башкалар турында җанлы әңгәмә йомгагы  әкрен генә сүтелә торды.

• “Өмет” гәзитен күпләп алдыручы районнар арасында Борай беренчеләр исәбендә тора, - диде әңгәмә барышында баш мөхәрриребез Рәдис Ногманов. – Дүртөйле, Илеш, Бүздәк, Чакмагыш районнарында да дусларыбыз күп. Безнең карашлар, почтальон дусларыбыз, сезгә юнәлгән, чөнки  сез – һәр йортка “Өмет”челәрнең күңел җылысын, алар зур тырышлык белән чыгарган басманы илтәсез, ике арадагы элемтәне ныгытасыз.

        Очрашу мизгелләрен чәй табыны артында ихлас аралашу, махсус кунагыбыз популяр музыкант, җырчы Салават Әкъсановның чыгышлары, мөхәррирнең изге теләкләре, җыр-моңнар ямьләп җибәрде.
     Арытаба борайлылар Уфаның Совет мәйданындагы Русия Герое Миңнегали Шәйморатов һәйкәле янында истәлеккә фотога төште. Аннан соң алар "Нур" татар дәүләт театрына спектакль карарга юнәлде.

                                                Руфина Таҗиева.