Заманча автобусларда

Дүрт ел эчендә Уфадагы җәмәгать транспоры төптән үзгәрде дияргә була. Хәзер кемузардан чабышкан “Газель”ләр юк, пассажирлар “Алга” социаль картасы белән ташламалы хакка “Башавтотранс” автобусларында йөри ала, шулай ук “Бәхетле сәгать” акциясенә ярашлы бер сәгать эчендә башка автобуска күчеп утырса, бушлай йөри ала.

Шушы көннәрдә Радий Хәбиров “Башавтотранс” оешмасына тагын 37 яңа автобус ачкычы тапшырды. Бу автобуслар Дим, Затон, Сипайлово, Инорс бистәләренә пассажирлар йөртәчәк.

Зур класслы автобуслар экологик чиста һәм аз күләмдә таләп иткән ягулыкта йөри. Яңа “Нефаз”лар уңайлы мөхит таләпләренә җавап бирә, шуңа инвалидлар өчен дә автобусларга утыру җайлы булачак. Автобуслар заманча җиһазландырылган – барсында да электрон таблолар, водительләр өчен тахографлар, салонда һәм автобус тирәли видеокүзәтү системасы, телефоннарга зарядка бирер өчен USB розеткалары, кондиционерлар бар.

• Уфа шәһәренең автобус паркын яңарту дәвам итәчәк, - дип хәбәр итте Радий Фәрит улы. – Сентябрь аенда тагын 33 автобус кайтуын көтәбез. Моңардан тыш, Башкортстан Русиянең Транспорт министрлыгы аша “Хәвефсез һәм сыйфатлы юллар” милли проекты кысаларында автобуслар сатып алырга федераль казнадан акча алачак. 2023 елның беренче кварталында 35 яңа автобус кайтачак.

“Башавтотранс”ның генераль директоры Надир Самиев әйтүенчә, бер автобуска 105 пассажир сыя, аларның 31е утырып бара ала. Кешеләр аеруча күп йөри торган магистраль урамнарда зур класслы автобуслар кирәк, бәләкәй автобуслар бөке тудыра, светофорларда тыгыла, ди директор әфәнде.

Шунысы кызык, 2018 елда Уфа урамнарына “Башавтотранс”ның нибары 230-250 автобусы рейска чыкса, бүгенге көндә аларның саны 600гә җиткән. Республика буенча исә 1900 автобус йөри. Соңгы дүрт елда “Башавтотранс”ка 980 яңа автобус кайткан.

“Башавтотранс” автобусларында йөрүче пассажирлар саны да күзгә күренеп арткан: 2018 елда алар 87 миллион пассажирны хезмәтләндерсә, 2021 елда аларның саны 104 миллионга җиткән. 2022 елда 116-120 миллионга җитәчәк, дип фараз кылалар. Кешеләр “Башавтотранс” автобусларын уңайлы һәм ышанычлы, дип бәяли.

Бу уңайдан Уфа урамнарына чыгып берничә кешенең фикерен белешергә булдым.

Альфира Сибгәтуллина, шәфкать туташы:

• Мин үзем Дим бистәсендә, Баланово авылыннан Уфага йөреп эшләгәч, бу үзгәрешләрне үз күзем белән күреп, үзем аша кичергән кеше. Элеккеге иске автобусларда газ исенә, аның гөрелдәгән тавышына исереп, Дим бистәсенә кайтып җиткәнче кан басымнары күтәрелә, күңел болгана башлый иде. Соңгы өч елда үзебезне Европада йөргән кебек хис итә башладык. Республика җитәкчесенә бу уңайдан зур рәхмәтләребезне белдерәсебез килә. Заманында кечкенә маршруткаларда көянтә кебек сыгылып йөргән вакытлар да булды, ул “Газель”га керә алмыйча басып калган чаклар да күп була иде. Бүген андый проблема юк, иртән Балановодан 16а автобусы белән Дим бистәсенә төшәбез дә, 57 санлы автобус белән Уфага китәбез. Автобуслар еш йөри, “бәхетле сәгать” белән кулланабыз, ягъни 16а га түлибез дә 57 белән Уфага бушка киләбез.

Марсель Сәйфиев, эшче:

• Элек урам тулы иске автобуслар йөри иде. Берсе өстенә икенчесе килеп менәрдәй булып ашыгалар, бер-берсенә юл бирмиләр иде. Аларга утырып йөрүләре, ай-һай, теңкәгә тия иде. Ничек барысы да яхшы якка үзгәрүен сизми дә калдык. Эшкә заманча зур автобуска утырып барып кайтам. Этеш-төртеш юк. Заманча, тәртип бар җирдә.

Сәлмән Шакиров, пенсионер:

• Хаклы ялда булсам да, бик актив кеше мин. Туганнарыма, балаларыма йөреп кенә торам. Базарга, зур кибетләргә дә еш барам. Шөкер, автобуслар хәзер уңайлы – төзекләр, зурлар. Курыкмыйча утырам. Элек хәтерлим, Уфага Затон бистәсеннән 30, 30к автобуслары белән барганда ярым-ачык ишекләреннән җил исеп, туңып, өшеп бетә идек. Хәзер, Аллаһка шөкер, заманча автобусларда җылы, җәй көне кондиционерлар эшләп тора.

Шулай да, бер тәкъдимемне дә әйтим әле: Уфа урамнарында электромобильәрне дә күрәсе килә. Алар күбәйсә, башкалабыз һавасы тагы да чистарыр иде.

Эльвира Әсәдуллина.