Тагын СанПиНны бозганнар

Башкортстанда  суд приставлары суд карары буенча тагын бер мәктәпнең азык-төлек блогын 60 көнгә япкан.

"Роспотребнадзор"ның планлы күчмә тикшерүе вакытында Ишембай районының Канакай авылындагы   Якуп Колмый  исемендәге урта гомум белем бирү мәктәбендә  азык-төлек блогы эшчәнлегенә карата  санитар-эпидемиологик таләпләрне бозу  очраклары ачыкланган.

"Яшелчәләр, балык һәм  барлык төр  итләрне беренчел эшкәртү, салкын кабымлыклар әзерләү барысы бер бинада башкарыла. Бу хәлләр учреждениедә йогышлы авырулар барлыкка килүгә ярдәм итә",-дип аңлаталар  федераль суд приставлары хезмәтенең  БР буенча  идарәсенең матбугат хезмәтендә.  

Юридик затка карата  административ  протокол төзелгән.  Ишембай шәһәр суды Ишембай районы, Канакай авылы, Школьная урамы, 25 адресы буенча азык-төлек блогының  эшчәнлеген  60  көнгә туктатырга карар итте.