Тәүге эшелон кузгалды

Көзге чакырылыш кысаларында хәрби эшелон составында гражданнарны хәрби хезмәткә озату тантанасы үтте. 100дән артык егетләребез Ерак Көнчыгышка юл алды. Яшьләр хәрби бурычларын коры җир гаскәрләрендә үтәячәк.

“Армия ир-егет өчен тормышында яңа  бит тә,  шул ук вакытта җитди сынау да. Сезгә,  хөрмәтле призывниклар, әйбәт хезмәт итәргә телим. Армиядә бер-береңә ярдәм итү, булышу мөһим. Бер-берегезгә ярдәм  итегез һәм исән-имин туган якларга әйләнеп кайтыгыз”, – дигән теләкләр теләде егетләргә республиканың хәрби комиссары полковник Михаил Блажевич.  

Юлга чыгар алдыннан призывникларның барысы да коронавирус инфекциясенә тестлар тапшырды. Егетләр медицина битлекләре, бахилалар, бактерияләргә каршы чаралар һәм кием-салым, азык-төлек белән тәэмин ителде.