Яңа аллеялар барлыкка килә

Бүген республикада инде традициягә әйләнгән «Яшел Башкиртстан» акциясе старт алды. Акция барышында җәмәгать һәм ишегалды территорияләрендә зур агачлар, үсентеләр утыртылачак. Беренче чиратта,  бу елда тематик аллеялар утыртуга аерым игътибар биреләчәк, шулай ук объектлар исемлегенә «Уңайлы шәһәр мохите формалаштыру» Федераль проекты кысаларында төзекләндерелгән иҗтимагый киңлекләр кертеләчәк.

Администрация мәгълүматларына караганда, республиканың 20 шәһәрендә 1 470 агачтан 23 тематик аллея («Җиңү», «Балачак», «Дан», «Хәтер», «Космонавтлар», «Спорт» һ.б.) утырту планлаштырыла. Гомум республика буенча 93 меңнән артык кеше катнашуы көтелә, 4 меңнән артык эре агач, 70 мең агач һәм куак утырту, 870 берәмлек махсус техника җәлеп итү планлаштырыла.

Акциянең беренче көне төгәлләнде. Анда бөтен республика буенча дистәләгән мең кеше катнашты-битараф булмаган кешеләр, мәктәп укучылары, студентлар, волонтерлар, хезмәт коллективлары, республика хакимияте органнары җитәкчеләре, муниципалитетларның администрация башлыклары. Уфа районында агач утырту өмәсендә Республика торак-коммуналь  хуҗылыгы министры урынбасары Илдар Хәмзин катнашты, ә Благовещенск районында акциягә Республика торак-коммуналь  хуҗылыгы министры урынбасары Николай Ельников кушылды.

– «Яшел Башкиртстан» акциясе елдан-ел массакүләм һәм активлаша бара. Бу көннәрдә барлык шәһәр һәм районнарда яшәүчеләр Башкортстанны тагын да яшел һәм чиста итү өчен агачлар һәм куаклар утырта. Шунысы куанычлы, гадәти чыршы һәм наратлардан тыш, шәһәрләр территориясендә бик сирәк сортлы  агачлар да барлыкка килә башлады, – дип билгеләп үтә Республика торак-коммуналь  хуҗылыгы министры урынбасары Николай Ельников.

Республикада әлеге акция 5 октябрьгә кадәр дәвам итәчәк.

Чыганак: pravitelstvorb.ru