Ни өчен финанс пирамидалары бетмәячәк?

Әйе, финанс пирамидалары белән даими көрәш алып барыла, бу җәһәттән сез хаклы. Ләкин алар киләчәктә бетәрме, монысы хокук саклау органнарының ни дәрәҗәдә нәтиҗәле эшләвенә бәйле. Ә әлегә Башкортстанда беренче яртыеллыкта “финанс пирамидасы” билгеләре булган 10 компания ачыкланган, дип хәбәр итә БР буенча Милли банкның матбугат хезмәте.

Бу компанияләр кулланучылар кооперативы һәм җаваплылыгы чикләнгән оешмалар рәвешендә эш иткән. Кайсыберләре тулы бер төркемнәр хасил иткән, аларны бер үк кешеләр оештырган. Бу компанияләр финанс эшчәнлеге алып бару белән бергә югары керем, я торак, я автомобильләр вәгъдә итеп, пирамидага җәлеп ителгәннәрнең акчаларын файдаланганнар.

“Заем алыр алдыннан компаниянең законлы статусы бармы, шуны тикшерергә кирәк, - дип бу җәһәттән киңәш бирә Милли банкның Башкортстан буенча управляющие Марат Кашапов. – Әгәр компания кредит оешмалары, финанс базарында катнашучылар исемлегендә юк икән, ул легаль булмаган оешма. Без мондый субъектлар турында Русия Банкына хәбәр итәргә киңәш итәбез. Моны банкның рәсми сайтының “Интернет-приемная” бүлеге аша эшләргә була”.