Гаилә – иң мөһиме

Бөре шәһәрендә Гаилә, мәхәббәт һәм тугрылык көненә багышланган матур фестиваль үтте. Бу чарада Башкортстан җитәкчесе Радий Хәбиров үзенең тормыш иптәше Каринэ ханым белән катнашты.

“Гаилә – иң мөһиме, ул безгә яшәргә һәм эшләргә көч бирә”, – диде ул һәм кунакчыл Бөре шәһәре халкына рәхмәтен җиткерде. Каринэ Хәбирова да Гаилә көне белән котлап: “Бер-беребезне саклыйк. Үзебезнең җылы белән яныбыздагы кешеләрне дә җылытыйк”, – диде.

Радий Хәбиров аерым мактауга лаек гаиләләргә “Ата-ана батырлыгы” медале тапшырды. Бу гаиләләрнең һәрберсе – матур бер тарих. Алар арасында Стәрлетамактан Зариповлар гаиләсе дә бар иде. Айрат һәм Вәсилә Зариповлар – дүрт тапкыр Паралимпия чемпионы Ирек Зариповның – әти-әнисе. “Башкортстан җитәкчесеннән мондый бүләк алу – безнең өчен зур мәртәбә. Улыбызның үзенең спорт уңышлары белән республиканын данын арттыра алуына шатбыз”, – диләр алар.

Әйе, республикада үрнәк итеп куярлык, сокланырлык гаиләләр бихисап. Киләчәктә аларның саны тагын да артсын. Ә Бөредә оештырылган Гаилә, мәхәббәт һәм тугрылык фестивале ел саен үткәреләчәк дип белдерде Радий Хәбиров.