Хатын-кызларга кыскартылган эш көне

27 июньдә Дәүләт Думасы беренче укуда “Бердәм Русия”нең авыл җирендә яшәүче хатын-кызлар өчен кыскартылган эш көнен саклау турындагы закон проектын кабул итте.

Бу документ, тулы эш атнасындагы хезмәт хакын саклап, хатын-кызлар өчен эш атнасын 36 сәгатьтән арттырмауны билгели. “Әлеге закон бернинди өстәмә хокуклар бирми, ә бу хокукларның бозылу ихтималы булган очракларга юл куймый”, – дип белдерде “Бердәм Русия” фракциясе җитәкчесе урынбасары Андрей Исаев.

Бүген Русия халкының 38 миллионга якыны авылда яши.Шуларның 20,3 миллионы – хатын-кызлар. Башкортстанда да халыкның 38% авылларда яши.

Исегезгә төшерәбез: агымдагы елның мартында РФ Хезмәт министрлыгы авыл җирендә яшәүче хатын-кызлар өчен кыскартылган эш атнасы нормасын бетерү тәкъдиме белән чыккан иде. “Бердәм Русия” партиясе әлеге инициативага каршы килде һәм Дәүләт Думасына әлеге норманы Хезмәт кодексында ныгытып куючы закон проектын кертте.