Кешеләр миңа ачуланмасыннар, диде Путин

Русия президенты Владимир Путин соңгы берничә елда халыкның реаль кереме кимүен, әмма хәзер яңадан үсә башлавын да билгеләде.

"Эш хакларына килгәндә — үсеш бар. 2017 елда икътисадтагы уртача эш хакы 33 мең 200 сум иде. Быел 44 мең диярлек. Соңгы айларда — 45 мең сум. Мондый хезмәт хакы юк дип, миңа кешеләр ачуланмасыннар. Мин уртача саннар турында сөйлим", — диде Владимир Путин.

Президент яшәү минимумыннан да түбәнрәк хезмәт хакы түләүне тикшерүләр үткәрү өчен сәбәп дип атады. Ул шулай ук русиялеләрне барыннан бигрәк керем дәрәҗәсе, сәламәтлек саклау һәм чүп-чар проблемалары борчуын билгеләде.

Моннан тыш, Владимир Путин милли проектларның ахыр максатын атады — ул икътисадны яңа рельсларга кую, кешеләрнең яшәү дәрәҗәсен күтәрү һәм дәүләт иминлеген тәэмин итү.