Данир Сабиров гаилә учагын кавказларча сакларга өнди

Данир Сабиров "Саклыйк әле гаилә учагын" җырын тәкъдим иткәндә аз гына мораль укып алган.

"Кавказ якларында гаиләләр таркалу - сирәк күренеш. Чечняда балалар йортлары бөтенләй юк дип сөйләгәннәр иде. Аларда шулай: бала ятим кала икән, аны якын туганнары тәрбияли. Узган 18нче елда Россиядә 60 проценттан артык аерылышулар теркәлкән, бу бик кызганыч. Нинди генә авырлыклар булса да, гаиләләрне саклап калсак иде", - дигән ул Инстаграмында.

Укучыларның берсе гаилә таркалуның сәбәбе дип хатын кызларны атаган.

"Чечен хатын-кызлары ирләре сүзеннән чыкмыйлар, нинди аерылу булсын инде. Безнең татар хатыннары гына үзгәрде хәзер, күз ясап, тырнак ясап, Европа хатыннарыннан калышмыйлар. Бөтен эшләре салонга йөрү, фитнеска йөрү, бер-берсеннән күреп күзләре тона, мин, мин мин кем дия башлыйлар. Үзләре өч тиенлек булсалар да", - дип язган бер ханым.

"Анда хатын-кыз изелеп, кыйналып яши шул, апаем. Аллам сакласын алар тормышын күрергә. Анда бит хатын-кызны кешегә санамыйлар, сарыкка тиңлиләр", - дип каршы төшкән икенче бер ханым.

"Ясасыннар тырнагын да, керфеген дә, чәчен дә. Аерылышу хатыннан гына тормый бит ул. Әйбәт ирдән бер хатын да китми. Ябышып ята", - дип яклаганнар хатыннарны.

Җырның видеосын шушы сылтама буенча карарга була. https://youtu.be/a91NLcERqQI