Башкортстан – дуслык иле, һәрбер милләт – аның гөле

Парламент спикеры әйтүенчә, моннан 100 ел элек безнең илдә федерализм үсешенә нигез салынган.

–Бу – гаять мөһим дата, аннан инде башка республикалар безнең эзләр буйлап атлаган. Бу –бик җаваплы адым, ул килешүне, еш кына капма-каршылыклы мәнфәгатьләрне килештерүне таләп иткән. Хәтта 90нчы елларда, республика федераль үзәк белән яңа мөнәсәбәтләр төзегән вакытта да, алар нигезенә нәкъ менә 1919 елда ук язылган күп кенә

принциплар салынган. Аларның идеологиясе бүген дә көнүзәк,–ди Константин Толкачев.

Февраль аенда ясаган чыгышында Башкортстан башлыгы вазифасын вакытлыча башкаручы Радий Хәбиров: “Республиканың 100 еллыгына багышланган зур тантаналар фазасына керәбез”,– дип билгеләде. 6 март көнне Мәскәүдә үткән зур концерт бәйрәм чаралары циклын ачып җибәрде. 12-13 мартта Федерация Советында Башкортстан Республикасы көннәре узды. Һәм менә 23 мартта иң мөһим чараларның берсе – республиканың 100 еллыгына багышланган тантаналы утырыш узачак.

100 еллык юбилейга Башкортстанда 100 яңа объект төзеләчәге турында карар кабул ителде.

Юбилей төзелеше дигән статусны иң кирәкле һәм ихтыяҗ аеруча зур булган проектлар алачак диделәр Хөкүмәттә. Шулай булып чыкты да: БР Икътисади үсеш министрлыгы юбилей төзелешләренең исемлеген әзерләде. Аңа гомум бәясе 23,5 миллиард сумга төшәчәк төзелешләр эләкте. Республика буенча 18 мәктәп, 10 балалар бакчасы, поликлиникалар, стадионнар, юллар һәм күперләр төзү дигән сүз иде бу. Башкортстанда яшәгән һәр кеше үзен әлеге тарихи дәвернең бер өлеше итеп тойсын өчен республикада күп нәрсә эшләнде, күп чаралар оештырыла.

–Быел әнә шул юбилей объектларының 72се куллануга тапшырылачак, – диде Хөкүмәттә

узган оператив киңәшмәдә чыгыш ясап Госстрой рәисе вазифасын башкаручы Марат Әхмәдуллин. – Быел куллануга тапшырылачак эре һәм социаль әһәмияттәге төзелешләрдән Затондагы Камышлы урамында төзелеп килүче Спорт әзерлеге үзәген һәм Уфаның Дим районындагы 1000 урынга исәпләнгән мәктәпне билгеләп үтми мөмкин түгел. Барлык эшләр дә графикка ярашлы алып барыла.

Госстрой башлыгы әйтүенчә, әлеге вакытта башкаладагы Республика онкодиспансерының хирургия корпусына янкорма, Бөредә поликлиника, Учалыда һәм Октябрьскийда яңа хирургия корпуслары, шулай ук Булгаково авылында һәм “Миловский парк” торак комплексында мәктәп, Инорс бистәсендә мәгариф үзәге төзелә.

Радий Хәбиров Башкортстанның төзелеш комплексын үстерү перспективалары турында фикер алышу өчен семинар-киңәшмә үткәрергә кушты. Аның фикеренчә, төзелеш барышында иң мөһиме – яшәү өчен уңайлы шартлар булдыру.

Әйткәндәй...

Башкортстанда төзелеш эшләренә соңгы чорда аеруча зур игътибар бүленә. Алар арасында “100 еллыкка – 100 төзелеш объекты” исемлегенә кермәгән социаль әһәмияттә-геләре дә бихисап. Мәсәлән, 18 мартта Уфаның 2нче санлы балалар поликлиникасының 6нчы санлы филиалы ремонт эшләре башкарылганнан соң үз ишекләрен ачты. Ачу тантанасында БР Сәламәтлек саклау министры вазифасын башкаручы Максим Забелин, Уфа шәһәре мэры Өлфәт Мостафин, Башкортстан башлыгы вазифасын вакытлыча башкаручы Радий Хәбировның тормыш иптәше Каринэ Хәбирова катнашты.

Гөлара Арсланова.