Барлык яңалыклар
Җәмгыять
18 октябрь 2018, 18:16

Иман иңгән авыл

Илеш районы Түбән Череккүл авылында мин белгәндә мәчет юк иде. Мәдрәсәсен дә ябып, аны клуб иткәннәр. Янында китапханә, медпункт, соңрак балалар бакчасы булды. Мәчетнең манарасын 30-нчы еллар уртасында аударалар. – Аны төшкә тикле кистеләр, –дип искә алды шушы авылдан Фәрит абый Самматов. – Аумый торды. Төштән соң Сәтыйгә әбиләр йорты ягына тартып төшерделәр. Югары оч малайлары – Югары очка, Түбән очныкылыр – Түбән очка: «Манараны кистеләр!» дип кычкыра-кычкыра йөгердек.

– Югары Череккүл мәчет манарасын 1939 нчы елны кистеләр, –ди Вафи абый Хәдимуллин. – Мәктәптә идек. Гоп иткән каты тавышка йөгереп чыксак, балчык тузаны күтәрелгәнен күрдек. Манараны авыл кешеләре кисмәде. Аларны авылдан авылга йөреп берәү кисә иде.
Ходайның рәхмәте, ике авылда да яңа мәчетләр барлыкка килде. Түбән Череккүлдә ул Уфада яшәүче Венера Шафикова-Фазлиәхмәтова башлангычы буенча төзелде. Ул XIX гасырда яшәгән, Базы елгасында тегермән тоткан, авылның абруйлы кешесе Шаһиморатның дүртенче буын оныгы. Мәчет аның әтисе хөрмәтенә бирелгән Мулламөхәммәт мәхәлләсе исеме белән теркәлгән. Яңа мәчет Югары Череккүл авылында да үсеп чыкты. Эшне шушы авылда туып-үскән Кәүсәрия Самматова оештырды.
Мәчетләрдә, Ходайга шөкер, җомга намазлары һәм төрле дини бәйрәмнәр үтеп тора. Түбән Череккүл мәчетен озак еллар Фоат абый Авзалов җитәкләде. Ул бакыйлыкка күчкәч, эшне Илүс Тимербаев алып бара.
–Ураза һәм Мәүлит бәйрәмнәрен үткәрү матур йолага әверелде. – дип сөйли Илүс Тимербай улы. – Рәмил Шамратов, Әсгать Нурмөхәммәтов, Фикус Сәетов, Мирзахадит Нурмөхәммәтов кебек авыл узаманнарының ярдәме зур. Хатын-кызлар ихлас йөри.
Быелгы корбан гаете мәҗлесен мәчетне төзүчеләр Фәдис һәм Венера оештырды. Ата-бабалар рухына багышлап алар чалдырган сарык итеннән ачык һавада тәмле итеп пылау әзерләделәр. өстәлләр хәләл ризыктан сыгылып тора иде. Чара алдыннан намазга бастылар, мәҗлес барышында дөньялар иминлеге хакына догалар укылды.
Илдус Тимерханов.
Илеш районы.