Габделфәт Сафин "игезәге"нә ДНК ясатачак (ВИДЕО)

 Күптән түгел Габделфәт Сафинның концертына "игезәге" килгән, дип язган идек. Монда кереп укый аласыз. Әле исә җырчы аны концертына чакырган.

Кунак нәкъ җырчы кебек киенеп чыккан: кара чалбарда, ак күлмәктә. Сәхнәдә алар бик кызыклы әңгәмә алып барган.

-Кайдан килдең син, әйт әле? - дип сорый аңардан Габделфәт.

-Мин Башкортстаннан, Благовар районыннан, - ди ул.

-Благовар? Әә, Туймазы ягында бит әле ул, әйме? Ничәнче елгы син?

-1970 елгы.

- Минем әти 1969 елда анда шабашкада булган иде анда. Әниең кем булып эшләде?

- Цемент сатучы.

-Ә минем әти каменщик булып киткән иде. Шулай булгач, синең әниең минем әтигә цемент сатканда... ДНК үткәрергә кирәк. Шулаймы? 

- Ярар, ярар, үткәрербез! - ди "игезәге".

-Ну, үткәрсәк инде, минем әти авылдагы йортын синең исемгә яздырырга "может", - дип шаярта җырчы. - ДНК ясатабыз да, 13 апрельдә "Пирамида" да үтәчәк концертта нәтиҗәсен әйтәбез, - ди Гадделфәт Сафин.

Бу күренештән залдагы халык көлә һәм аларны алкышларга күмә.